Sukutam...

Sima sol ta poi na kalmisera mar
Tartaruga ta poi na koba-l-ria
Nha olhar ta poi na fundo di bus odjus
Pa desova um sentimento grandi...
Sima korbu ta anda na altura
Mas ê ta kumi na txom,
Omi pa mas sunha
Ka ta pasa séu
Mi n’ta odja longi
Mas kel k n’kre sta dentu-l-mi... 
É ka odju k odjau,
É kurasom k skodjeu!
É ka bentu k soprau,
É distinu k panhau!
E kada bez k n’odjau
Nha odju ê redondu sima lua xeia! 
Sima pásaru ta bati si asa divagarinhu
Nha sorizu ta flutua na bu olhar...
Sima onda ta toka na areia ku karinhu ku kuidadu,
Nkre pa bu mô toka nha mô...
É mas di k um magia dún planta amoldurado
Ês serenidadi di nha amor pa bô! 
Eneida Nelly (15 Nov 1986 - 18 Jul 2011, Tarrafal)

 
Design by Free WordPress Themes | Bloggerized by Lasantha - Premium Blogger Themes | Laundry Detergent Coupons