1.2.12
Eurídice Monteiro
Des di pikinóti
N mimadu
N stimadu
N kriadu na agu-l boka
Familia pa tudu banda
Ligria y kontentesa
N ka dexadu konxi tristesa
Pa oji mi mudjer
Ku nha dôs pé na txon
Korpu linpu
Lingua doxi
Skóla na kabésa
Pa gaju mal-paridu
Ta injuria-m des manera
Forti ka kusa sabi konta
Keli si nhas grandi sabi
Ta doensi na pó di kama
Ta morri di disgostu
Más N ten fé firmi
Sima ka ten sabi ki ka ta kaba nunka
Tanbe ka ten dor ki ta dura pa sempri
Xuxadera des terra
Ten ki kaba
Es gerason formadu ta tormenta kumpanheru
Sima mi N ten fé ma nha óra ta txiga
Ma lus ta lumia nha kaminhu
Ma felisidadi ta konki-m nes porta
Posted in: 7. Versos Rabiscados
